『一唔一齊玩狼人?』
『好...』
『做咩呀? 你唔鍾意玩咩?』
『嗯...唔算好鍾意...』
但係我鍾意你。
「用心製作，新鮮地道」——呢句說話係我地四年前對自己許下過嘅承諾。但四年之後，我地已經任由佢塵封喺頻道嘅簡介入面好一段日子。「用心製作」變成「有片出就好」，而我地嘅思想態度創意亦都一早過期。
喺迷失狀態下迎接四週年，我地冀望，可以用返四年前嘅心情去做一條片。能力足夠嗎? 時間足夠嗎? 天份足夠嗎? 我地允許腦袋暫時隔絕呢啲問題。
因為Bella想拍關於狼人嘅愛情故事，所以就去做。
因為未試過拍懸疑驚慄，所以就去做。
因為想有一首廣東話版嘅《天黑請閉眼》，所以就去做。
因為想做，所以幾不安、幾唔肯定都去做。
呢條片唔會係我地最完美嘅作品，但只少今次我地可以真誠咁講，佢就係目前以我地嘅能力喺呢個時間框架下，可以盡到最大嘅努力。
由今日開始之後嘅日子，就寄望大家願意繼續見證我地嘅進步。
呢4年嚟好多謝你地嘅不離不棄，未來請多多指教。
Search